29-апрель күнү таңга маал Баткен районунун Көк-Таш айылындагы кыргыз-тажик чек арасында ок атышуу учуру катталды.
Маалымат каражаттарынын билдирүүсүндө, Баткен районунун Көк-Таш айыл аймагында 50-60тай айылдын кары-картаң кишилери, аялдары мечитте топтолуп турат.
Жергиликтүү тургундар Ош-Исфана жолунун Жака-Өрүк участогу жабылып, каттам токтогонун, тажик тарап жолду тосуп алып каттагандарды өткөрбөй ок атып жатканын, Кыргызстандын бир жаранына ок тийгенин билдиришти.
Баткен облусттук ички иштер башкармалыгы 29-апрелде түнкү саат бирлер чамасында “Головной” тилкесинде чогулган эки тараптын эли таркап кеткенин, абал салыштырмалуу туруктуу экенин кабарлаган.
Улуттук коопсуздук боюнча мамлекеттик комитеттин Чек ара кызматынын басма сөз бөлүмү 28-апрелде кечинде Кыргызстан менен Тажикстан чектешкен “Головной” тилкесинде чыккан чыр тууралуу маалымат берип, азыр абал чыңалган абалда деген.
“Головной” тилкесиндеги 28-апрелде болгон кагылышуудан тажик тараптан төрт, кыргыз тараптан үч адамга таш тийип жарадар болду.
УКМК Чек ара кызматы тажик тарап маалыматтарды бурмалап, эки элди козутуп жатканы тууралуу билдирүү таркатты.
